மாதவன் பிறந்தநாள் ஸ்பெஷல்

சாக்லெட் பாய் ரோல்களில் தனது நடிப்பால் ரசிகர்களை அதிகம் கவர்ந்தவர் மாதவன். தமிழ் சினிமா மட்டுமின்றி ஹிந்தி, தெலுங்கு என மற்ற சினிமா துறைகளிலும் அவருங்கு ரசிகர்கள் ஏராளம்.

இன்று மாதவனுக்கு 50வது பிறந்தநாள். அதற்காக ரசிகர்கள் மற்றும் சினிமா பிரபலங்கள் வாழ்த்து தெரிவித்து வருகின்றனர்.

அலைபாயுதே படம் மூலமாகத்தான் தமிழில் ஹீரோவாக அறிமுகம் ஆனார் மாதவன். மணிரத்னம் இயக்கத்தில் உருவான இந்த படம் ஏப்ரல் 14, 2000ல் ரிலீஸ் ஆனது. இந்த படம் வந்து இருபது வருடங்கள் ஆனதை சமீபத்தில் ரசிகர்கள் கொண்டாடிய நிலையில் அந்த படத்தில் நடித்தது பற்றி மாதவன் நெகிழ்ச்சியாக பேசி இருந்தார். அலைபாயுதே படத்தில் தான் சினிமாவில் பல நுணுக்கங்களை கற்றுக்கொண்டதாக மாதவன் தெரிவித்து இருந்தார்.

படத்தில் வரும் ரயில் நிலைய ப்ரோபோசல் சீன் தற்போதும் அதிகம் பேசப்படும் ஒன்று. அதில் ஷாலினி அஜித்தை நினைத்தும், மாதவன் அவரது மனைவி சரிதாவை நினைத்தும் நடித்தார்களாம். அதனால் தான் அந்த காட்சி உண்மையாக இருந்ததற்கு காரணம் என அந்த பேட்டியில் மாதவன் குறிப்பிட்டார்.

அதற்கு பிறகு என்னவளே என்ற படத்தில் நடித்தார் மாதவன். அதன் பின் அவரது நடிப்பில் 2001ல் வெளிவந்த மின்னலே படம் பெரிய அளவில் பேசப்பட்டது. தற்போது முன்னணி இயக்குனராக தமிழ் சினிமாவில் வலம் வரும் கவுதம் மேனன் இந்த படத்தின் மூலமாகத்தான் இயக்குனராக அறிமுகம் ஆனார்.

இந்த படத்தின் கதையை கெளதம் மேனன் மாதவனிடம் கூறிய போது அவருக்கு அது அதிகம் பிடித்துவிட்டது. ஆனால் அந்த கதையை பல தயாரிப்பாளர்கள் கேட்டுவிட்டு அதை தயாரிக்க தயங்கினார்களாம். ஆனாலும் அதில் நடித்தே ஆக வேண்டும் என உறுதியாக இருந்தார் மாதவன். அதன் பிறகு ஒரு தயாரிப்பாளர் ஒப்புக்கொண்டார். ஹரிஷ் ஜெயராஜ் இதற்கு இசையமைத்தார். பாடல்கள் மற்றும் படத்திற்கு ரசிகர்கள் மத்தியில் நல்ல வரவேற்பு கிடைத்தது.

அதன் பிறகு அதே கூட்டணியில் மின்னலே படத்தை ஹிந்தியில் ரீமேக் செய்தனர். Rehnaa Hai Terre Dil Mein
என்ற அந்த படத்தை கெளதம் மேனன் தான் இயக்கி இருந்தார். ஆனால் பாக்ஸ் ஆபிசில் அதற்கு வரவேற்பு அதிகம் கிடைக்கவில்லை.

அதன் பின் லிங்குசாமி இயக்கத்தில் மாதவன் நடித்த ரன் படம் மூலமாக ஆக்ஷன் படங்களில் நடிக்க துவங்கினார் மாதவன். அதுவரை சாக்லெட் பாய் ரோல்களில் மட்டுமே நடித்து வந்த அவருங்கு இந்த அனுபவம் சற்று வித்யாசமாக இருந்திருக்கும்.

கதை சொல்லும் போது ரன் படத்தில் வரும் ஷட்டர் காட்சியை பற்றி லிங்குசாமி சொன்ன பிறகு அதில் நடிக்க ஒப்புக்கொண்டாராம் மாதவன். காரணம் ஆக்ஷன் நடிகராக களமிறங்க இது சரியான கதை என அவர் நம்பினார். ரன் படமும் வெளியாகி நல்ல ரசிகர்கள் மத்தியில் நல்ல வரவேற்பை பெற்றது.

அதன் பின் பிரியமான தோழி, ஜேஜே, ஆயுத எழுத்து போன்ற படங்களில் நடித்த பிறகு படிப்படியாக ஹிந்தி சினிமாவில் கால் பதிக்க துவங்கினார் மாதவன்.

அதன் பின் சில வருடங்கள் இடைவெளிக்கு பிறகு மீண்டும் தமிழ் சினிமாவுக்கு திரும்பிய அவர் சுதா கொங்கரா இயக்கத்தில் இறுதிச்சுற்று படத்தில் நடித்தார். ஒரு காலத்தில் சாக்லேட் பாய் தோற்றத்தில் இருந்த மாதவனா இது என ரசிகர்கள் வியக்கும் அளவுக்கு இந்த படத்தில் அவரது தோற்றம் இருந்தது. சற்று அதிக முடி, தாடி என வித்யாசமான தோற்றத்தில் மிரட்டினார் அவர். அந்த படமும் பெரிய அளவில் ஹிட் ஆனது.

அதன் பின் மிகப்பெரிய அளவில் பேசப்பட்ட படம் விக்ரம் வேதா. அதில் மாதவன் போலீஸ் அதிகாரியாகவும், விஜய் சேதுபதி ரௌடியாகவும் இந்த திரில்லர் படத்தில் நடித்திருந்தனர். தமிழ் சினிமா ரசிகர்கள் இதுவரை பார்த்திராத ஒரு விதத்தில் படம் இருந்ததால் அது பெரிய ஹிட் ஆனது.

அடுத்து தற்போது மாதவன் நடிப்பில் நிசப்தம், மாறா, ராக்கெட்ரி ஆகிய படங்கள் தமிழில் ரிலீஸ் ஆக தயாராகி வருகின்றன. 20 வருடங்களை கடந்த மாதவனின் சினிமா வெற்றி பயணம் தொடரும்.

Spread the love

Leave a Reply